ဟိုး ရှေ့ရှေး ကျနော်တိ့လူမဖြစ်သေးခင် တုန်းကပေါ့ ကမ္ဘာကြီးမှာ မီးဆိုတာမရှိသေးဘူးတဲ့။ မီးမရှိသေးတော့ ကမ္ဘာပေါ်မှာရှိနေတဲ့
လူသားဟာ အသားစိမ်းတွေကိုပဲ စားရတာပေါ့ နောက်ပြီး နေ့ဘက်ဆိုလင်းပြီး ညဘက်ဆိုမှောင်တဲ့အတွက် အမှောင်ကိုကြောက်တဲ့
လူသားအတွက် ဒုက္ခတမျိုးပေါ့။ဒီလိုနဲ့ လူသားဟာ သူ့ရဲ့ညပေါင်းများစွာကို အမှောင်ထဲမှာပဲ ဖြစ်သလိုဖြတ်သန်းနေတာကို
ကောင်းကင်နိုင်ငံမှာရှိတဲ့ နတ်သားတပါးဖြစ်တဲ့ သီအို ကသနားသွားသတဲ့။
တနေ့တော့ မနေနိုင်မထိုင်နိုင်နဲ့ လူသားရှိတဲ့ကမ္ဘာမြေကြီးဆီကို သီအိုနတ်သားဟာ ကောင်းကင်နိုင်ငံမှာပဲရှိတဲ့ မီးကို ဇူး
နတ်မင်းကြီးမသိအောင် ခိုးပေးလိုက်သတဲ့။ မီးကိုရရှိသွားတဲ့ လူသားဟာအလွန်ပျော်ရွှင်စွာနဲ့ပဲ သားကောင်းတွေကို
မီးနဲ့ ကင်စားလိုက်၊ ဖုတ်စားလိုက်၊ ပြုတ်စားလိုက်နဲ့ အမျိုးကို တီထွင်လာလိုက်တာ အတော့်ကိုအဆင့်မြင့်သွားသတဲ့။
ဒီကိစ္စကို အမှတ်မထင်နဲ့ပဲ ကောင်ကင်နိုင်ငံက ဇူး နတ်မင်းကြီးသိသွားပါလေရော။ သိသိချင်းပဲ ဇူး နတ်မင်းကြီးဟာ
အင်မတန်မှ ဒေါသထွက်သွားသတဲ့။ ဒါနဲ့ ဘယ်သူပေးသလဲ လိုက်စုံစမ်းတော့ သီအိုနတ်သားလေးရဲ့ လက်ချက်ဆိုတာ
သိတာနဲ့ သီအိုနတ်သားကို ခေါ်လိုက်ပြီး ကြိမ်းမောင်းသတဲ့...
"မောင်မင်းဟာ အင်းမတန်မှအသုံးမကျတဲ့ နတ်သားပဲ လူသားဟာမီးကိုရရှိသွားတာနဲ့ အင်မတန်မှကိုတိုးတက်ပြီး
ကျုပ်တို့ရဲ့ ကောင်းကင်နိုင်ငံကိုတောင် ရန်ရှာလာနိုင်တယ်ဆိုတာ မောင်မင်း တွေးမိဘူးလား" လို့
ကြိမ်းမောင်းပြီးလူသားကို ဒဏ်ခတ်ဖို့အတွက် သီအိုနတ်သားကို တာဝန်ပေးသတဲ့။ အဲ့ဒီတာဝန်ကတော့ လူသားရှိတဲ့
ကမ္ဘာပေါ်ကို မိန်းမတယောက် နဲ့ သေတ္တာတလုံး ပို့လိုက်ဖို့ပဲဖြစ်ပါတယ်။ ကမ္ဘာပေါ်ကိုပို့ကာနီး သီအိုနတ်သားက
မိန်ခလေးကိုဘာမှာလဲဆိုတော့
"မင်းကမ္ဘာမြေကြီးဆီကို သွားရမယ် ရောက်တာနဲ့အဲ့ဒီမှာရှိနေတဲ့ လူသားနဲ့လက်ထပ်ရမယ်၊ လက်ထပ်ပြီးရင် မင်းနဲ့လူသား
တို့ရဲ့ မျိုးဆက်တွေပွားများလာမယ် ဒါပေမယ့် မင်းနဲ့အတူထည့်ပေးလိုက်တဲ့ သေတ္တာကိုတော့ လုံးဝမဖွင့်ကြည့်ပါနဲ့ ဖွင့်လိုက်လို့
သေတ္တာထဲက အရာဝတ္ထုတွေ အကုန်ထွက်သွားရင် မင်းရောမင်းရဲ့မျိုးဆက်တွေပါ သေကြရမယ်" လို့မှာလိုက်သတဲ့။
မှာလို့လဲပြီးရော ချက်ချင်းဆိုသလိုပဲ လူသားရှိရာကမ္ဘာမြေကြီးဆီ ကောင်မလေးကို ပို့လိုက်ရောတဲ့ ရောက်ရောက်ချင်းတော့
လူသားဟာလန့်သွားသတဲ့ ဘာပါလိမ့်ပေါ့။ သိပ်မကြာပါဘူး အချင်းချင်းမိတ်ဆက်ကြပြီး ခင်မင်ရာကတဆင့် ချစ်သူတွေဖြစ်
သွားပြီး လက်ထပ်လိုက်ကြသတဲ့။
ဒီလိုနဲ့ နေလာလိုက်တာ သား သမီးတွေပွားစည်းပြီး ပျော်ရွှင်စွာနဲ့ ဖြတ်သန်းလာရင်း တနေ့ကျတော့ အဲ့ဒီကောင်မလေးဟာ
သူ့နဲ့အတူပါလာတဲ့ သေတ္တာကိုဖွင့်ကြည့်ချင်လာသတဲ့ ဖွင့်လိုက်ရင်လဲသေမှာကိုတော့ ကြောက်တယ် ဒါပေမယ့် မလုပ်နဲ့လို့
ပြောရင် ပိုလုပ်ချင်တဲ့ဇာတိစိတ်ကို မလွန်ဆန်နိုင်တဲ့အဆုံး ဖွင့်ကြည့်လိုက်ပါလေရော......
ဗြုန်းဆို မီးခိုးတွေအူထွက်လာပြီး သေတ္တာထဲက ပစ္စည်းတွေဖြစ်တဲ့ ပျော်ရွှင်ခြင်၊ ၀မ်းနည်းခြင်း၊ ချစ်ခြင်း၊ မုန်းခြင်း၊ ကြည်နူးခြင်း
စသဖြင့် တခုချင်းထွက်ကုန်သတဲ့ ဒီလိုနဲ့ ရုတ်တရက်ကောင်မလေးဟာ အကုန်လုံးထွက်သွားရင် သေမယ်လို့ အမှာစကားကို
သတိရသွားသတဲ့ ရရချင်းပဲ သေတ္တာကိုအမြန်ပိတ်လိုက်တယ် ကံကောင်းထောက်မစွာနဲ့ သေတ္တာထဲမှာ ပစ္စည်းတခုပဲ ကျန်ခဲ့
သတဲ့။
အဲဒီ ကျန်ခဲ့တဲ့အရာတခု ကြောင့်သာ ကမ္ဘာဦးလူသားနဲ့ ကောင်မလေးတို့ရဲ့ မျိုးဆက်ဖြစ်တဲ့ ကျနော်တို့ဟာ အသက်ရှင်နေကြတာ
ဖြစ်တယ်။ သူတို့ရဲ့မျိုးဆက်ဖြစ်လို့ ကျနော်တို့ဟာ မလုပ်နဲ့ဆိုတာကို (မကောင်းဘူးလို့ ဘယ်လောက်ပြောပြော) လုပ်ချင်ကြတယ်
ရအောင်လဲလုပ်ကြတယ်။ ပြီးတော့မှ အော်ဒါကဒီလိုပါလားလို့ နောင်တ လို့ခေါ်မလား အသိတရားလို့ခေါ်မလား တခုခုကိုရရှိကြ
တယ်။
ကိုသိချင်တဲ့ကိစ္စကိုလဲ အသက်အန္တရယ်နဲ့ ဘယ်လောက်နီးနီး စူးစမ်းရှာဖွေကြတယ်။ တားဆီးလာရင်လဲ မကြိုက်ကြဘူး ဒါကျနော်တို့
မွေးရာပါဇာတိစိတ်ဖြစ်ပါတယ်။ ထားပါတော့ ပုံပြင်လေးကို ပြန်ဆက်ရရင် အဲ့ဒီသေတ္တာထဲမှာ ဘာကျန်ခဲ့သလဲ ကျန်ခဲ့တဲ့အရာဟာ
တခုတည်းဖြစ်တယ် ဒါပေမယ့် ကျနော်တို့လူသားအားလုံး အသက်ရှင်နိုင်စွမ်းတယ်ဆိုတော့ ဘာဖြစ်မလဲ ဘာဖြစ်နိုင်လဲ ???
အဖြေကတော့
မျော်လင့်ချက် ဖြစ်ပါတယ်။ ဟုတ်ပါတယ် ကျနော်တို့အားလုံး မျော်လင့်ချက်တွေနဲ့ အသက်ရှင်နေခဲ့တာပါ အနည်းဆုံးလူတယောက်မှာ
မျော်လင့်ချက်တခုလောက် တော့ရှိပါတယ်။ မျော်လင့်ချက်တခုမှ မရှိတဲ့လူဟာသေနေတဲ့လူ ဖြစ်ပါတယ်။ မျော်လင့်ချက်မဲ့သွားရင်သူဟာ
လူ့ဘ၀ကြီးမှာနေဖို့ မလွယ်တော့ပါဘူး ဒီတော့မထူးဇာတ်ခင်းကြပါတယ်။ ကိုယ့်ကိုယ်ကိုယ် သတ်သေမယ် အခြားသူကိုပြဿနာရှာမယ်။
စသဖြင့် လူ့သဘာဝနဲ့ မအပ်စပ်ရာတွေကို လုပ်လာလေ့ရှိတယ်။
ဒီတော့ ကျနော်တို့အနေနဲ့ ကိုယ့်မျော်လင့်ချက်ကို ကိုမသတ်မိဖို့နဲ့ အခြားသူတွေရဲ့ မျော်လင့်ချက် သေတ္တာကိုလဲသွားပြီး မဆွဲဖွင့်မိကြဖို့
ဒီဝတ္တုတိုလေးနဲ့ တိုက်တွန်းတောင်းပန်လိုက်ရပါတယ်။ ။
ကြခတ်
မှတ်ချက်။ ။ ငယ်ငယ်တုန်းက ဖတ်မိတဲ့ ၀တ္တုတပုဒ်ထဲမှာ အကြောင်းအရာများကို မှတ်မိသဖြင့် ရေးခြင်းဖြစ်ပါသည်။ တနည်းအားဖြင့် မှီငြမ်းဖြစ်ပါသည်။
No comments:
Post a Comment